قصيدة أنا أخوان للشاعر هشام الجخ

أنا إخوان وكل المسلمين إخوان
فما تصنفش إسلامي علي كيفك
حقيقتي أقوي من زيفك
وصوباعي لوحده بكفوفك
ولاتهزش قصاد خوفك
ياخوف يا جبان أنا إخوان
بطيع الله فملكوته
وبدعي يزيدني من فضله ومن قوته
وأصلي وأصوم
وأجاهد نفسي وأصبر ع البلا وأحمد وحمدي يدوم
لأنه الرازق الوهاب وهو مسبب الأسباب
فليه الفضل والمنة وليه الطاعة
فماتبصش لديني نظرة طماعة
أنا ديني لا هو سلعة ولا بضاعة
ولا ليه سوق
*****
لا أنا بايع ولا شاري
إيماني هوة راسمالي
ف إصحي وفوق
مانيش إخوان علي نهجك
فلم من الدروب همجك
كفاية شقوق
مش انت لوحدك الإخوان
أنا إخوان بحق الله وبالسنة وبالقرآن
وقت الجد أنا عثمان
وقت الحرب أنا حمزة
ووقت الفصل ببقي فاروق
*****
أنا إخوان علي الرحمة وع التقوي وحب الناس
لكن عمري ماهتأخون بأخونتك علي الصندوق
عينيكم فيها كل النور ومش شايفة
غباوة إنك تهدّد ناس ماهيش خايفة
دا أنا الآهة اللي طلقوني
وجيعة وسارحة ف الشارع
ومش ممكن هتخفوني
هتسمعني وغصب عن عنيك الجوز علي دماغك هترفعني

*****
أنا الناس اللي عاشت تحت خط الفقر
وأنا الناس اللي ماتت ملتقتش القبر
ف سيبك م اللي بيجاملك واللي بيهيص
وركزلي واسمع كلمتي كويس
أنا الثورة اللي عملت منك الريس
أنا اللي يادوب من سنتين
كنّا بنتحبس صُحبة
وكنّا بنتجلد صُحبة
وكنا فى الميدان صُحبة
*****
بتبعد ليه وتكتب ع الطريق غُربة
بتمشي ف الطريق الصعب وحدك ليه
مهمّلني
فلو صعبة عليك الشيلة شيلني
تلاقيني معارضك آه لكني وراك
بقدف ف السفينة معاك
أكون ودنك.. أكون عينك
أكون قوة فدراعينك
نبني بلدنا لهوانا
مش لهواك
وخيرنا يبقي جوانا مش جواك
*****
مش انت تخدلي ف القرارات وأنا أمسح بإيدي (.....)
ماتتلككش بالناس اللي بيعارضوك
ما تتشتتش ما تتسوحش
بلدنا عايزة ريس وحش
يسمع نقده بودانه
ما يتكبّرش
يكون جبّار علي الظالمين
رحيم بينّا ينام بينّا
ويقوم بينّا
يمشي يبص ف الشارع علي الجعانين
ويفهم إن ف الشارع شباب ثايرين
ما لحقوش يبقوا كارهينك
ما تخدعناش ببقين من بتوع حسني يا مولانا
فماتزودش نار الكُره ف قلوبهم
شباب شايف فلوس بلده مش بتخش ف جيوبهم
وريمنا كلام
*****
وصدّي من الغني قفانا
ما تدبحليش حمامة يتيمة علي عينها
وتقنعني إنه ديك رومي
ما تلعبش انت ف الميّه وتمسح إيدك المبلولة ف هدومي
ومش كل أما توعد وعد تطلع بق
ماتشدش فرامل اليد وتطلب مني أنزل أزق
ولما الناس تكون ثايرة ما تخطبليش فى أتباعك
ولما تكون مع وزيرة ما تلعبليس فـ.... "دراعك"
ولا تسمعّني ولا أهلي ولا عشيرتي
وخيرنا يبقي لبلدنا قبل ما أبص علي جيرتي
بلدنا أحواض من البركة بعُمر النيل
بلد دفيانة بالقرآن.. وبالإنجيل